أقوى وأخطر كلام لنيافة الأنبا رافائيل ضد البدع الحديثة رسالة هامة جداً

تعرف على أقوى وأخطر عظة لنيافة الأنبا رافائيل ضد البدع الحديثة:
أقوى وأخطر عظة لنيافة الأنبا رافائيل ضد البدع الحديثة!
رسالة هامة جدًا إلى جميع الرعاة والخدام في الكنيسة القبطية!
إنكار وراثة الخطيئة الأصلية والعقوبة وشرح مفهوم “التأله”!
البابا شنودة حفظ إيمان الكنيسة ضد كل هذه التيارات!

†1 عايز أفتح معاكم موضوع مثار في الجو الكنسي، خصوصا على مواقع التواصل الإجتماعي، حوار لاهوتي وناس بتغّلط  ناس، وطبعا أكتر فئة بتتأثر بهذا الوضع هما الشباب المثقف والخدام، يمكن شعب الكنيسة ميكونش حاسس أن فيه حاجة ودول يمثلوا الأغلبية الساحقة، فأنا يهمني أنتم كخدام تبقوا دريانيين أيه الصح وأيه الغلط؟!

†2 اللي ماشي دلوقتي في الجو ده بيقولوا أيه؟، ناس من اللي درسوا علم الآباء وخرجوا بره أخدوا شهادات علمية في هذا الأمر، طلعوا يقولوا أن الكنيسة في فترة حبرية البابا شنودة 40 سنة، كان هناك لاهوت خاص بالبابا شنودة، يعني هو بيشرح حاجات من عنده مش مرتبطة بفكر الآباء، لدرجة أن حد منهم قال أن اللي دمره البابا شنودة في 40 سنة محتاج 100 سنة علشان يتصلح، وقالوا عليه أنه كان محدود الثقافة وميعرفش لغات! وأن مكنش فيه حركة الترجمة من علم الآباء، فالجيل بتاع البابا شنودة والأنبا غريغوريوس والناس الكبيرة ديه اللي وصلهم من فكر الآباء هو النسكيات فقط!، طبعا الكلام ده غلط!

†3 وقالوا أن المرجع بتاع اللاهوت اللي علموا بيه الجيل بتاع البابا شنودة هو لاهوت العصر الوسيط في أوروبا، زي أنسلم رئيس أساقفة كانتربري وده كان حد فعلا ليه لاهوت خاص، وقالوا أن هما اللي هيعلموا اللاهوت الأرثوذكسي الأصيل بتاع الآباء وفتحوا مراكز يعلموا فيها هذا الكلام وينشروا أن الكنيسة ماشية غلط واحنا هنصحح الوضع! الحقيقة التيار ده جذب مجموعات كتير من الشباب، اللي كان ناقم على الكنيسة أو زعلان من الكنيسة أو عنده روح الإعتراض أو بيحب الفكر البروتستانتي، كله صب في الحتة دي، وطبعا بدأت الناس تكتب حاجات، وفيه تيار تاني بيرد عليهم، وبقت حرب مشتعلة!

†4 حقيقة الأمر أن البابا شنودة كان مثقف جدًا! مش محتاج أشرحها! وكان يعرف لغات، على الأقل يتقن الإنجليزي إتقان إكسلانت، ومكتبته مازالت موجودة فيها جميع أنواع الكتب من كل حتة، فيها كتب الآباء بالإنجليزي، أحيانا بيعتبروا أن الإنجليزي مش دقيق والأفضل نرجع لليوناني، لكن المعلومة دي أوعوا تصدقوها، لأن الكتب المترجمة للإنجليزي معتمدة من جامعات محترمة زي أوكسفورد وحاجات زي كده، مش ممكن جامعة محترمة ترضى بترجمة من اليوناني للإنجليزي فيها خطأ، لأنهم معندهمش النعرة الدينية هما عندهم النعرة العلمية، أنت مترجم لينا كتاب من اليوناني للإنجليزي يبقى Perfect، فاللي بيقرأ من أصل إنجليزي ميعبهوش، ومش لازم كل واحد علشان يبقى مسيحي يدرس يوناني، فالكلام ده مش مظبوط!

†5 طب هما ليه بيقولوا كده؟ فيه قصة ترتبط بهذا الكلام حصلت في أوروبا، المسيحية الأرثوذكسية (الخلقيدونية) كانت تتركز في القسطنطينية في العصور القديمة، طبعا الإسكندرية كانت مركز ضخم وكبير ومهم ومحترم لكن أستبعدنا من أيام مجمع خلقيدونية سنة 451م، يعني احنا من القرن الخامس عزلونا، وهما شغالين شرق (قسطنطينية) وغرب (روما)، وكانوا في شركة معًا حتى القرن الـ 11، وحصل إنشقاق بين الشرق والغرب، بعد كده في قرون لاحقة قامت الدولة العثمانية، والدولة العثمانية أستولت على كل المنطقة العربية وأوروبا، ومركزها القسطنطينية اللي دلوقتي أسطنبول اللي هي حاليا في تركيا، كل المسيحيين اللى فى تركيا هربوا،اللى عايز يدرس لاهوت راح يدرس فى جامعات الغرب، الكلام ده في العصور الوسطى.

†6 فى القرن العشرين سنه 1917 حصلت الثورة البلشفية فى روسيا، وروسيا أكبر دولة مسيحية أرثوذكسية حتى الآن، ففيها علماء كتير لاهوت كلهم طفشوا من الإضطهاد الشيوعى والإلحاد اللى كان موجود وقتها، ولما هاجروا وراحوا أوروبا اكتشفوا أن علماء اللاهوت الارثوذكسيين بتوع القسطنطينية اللى طفشوا لاهوتهم متأثر بأنسلم والناس بتوع الغرب، فهما بيعملوا اسقاط علينا أن احنا كمان كده!

†7 لكن هما اكتشفوا الخطأ ده عندهم، مين أول واحد اكتشف دى وعلم بيها؟! هو جورج فلوروفسكى، الاسم نفسه يدل على أنه روسى، وحط علم جديد هو الـ New Patristic أى علم الآباء وقال ان علم الـ Patristic الموجود دلوقتى ملوث بأفكار غربية فهنعمله تنقيه وهنرجع للآباء الأولين ويبقى New Patristic ده مرجع لينا فى أى سؤال لاهوتى نلاقى فيه الإجابة بتاعتنا لغاية كده الكلام كويس انك بتنقى فى اللاهوت من أى شوائب دخلت عليه!

†8 مين المرجع بتاع الأرثوذكسية فى الأصل، فى نظرنا القديس أثناسيوس والقديس كيرلس الكبير، هما رجعوا لواحد اسمه غريغوريوس بالاماس كان عالم من علماء الكنيسة البيزنطية فى القرن ال14 واحنا لانتفق معه فى كثير من الأحوال، واعتبروه أن ده المرجع وكتبوا فى النيو باترستك أن غريغوريوس بالاماس هو حجر الزاوية فى التقليد الارثوذكسى احنا بالنسبة لنا هو مش حجر الزاوية، احنا بالنسبة لنا فى الفكر أثناسيوس، غريغوريوس بالاماس هو قديس عظيم عندهم هو طور فى اللاهوت وعمل فلسفات أخدت اللاهوت الاصلي البسيط بتاعنا طوحته بعيد، منها فكرة “التأله”، وفكره”الخطية الاصلية”وكل المشاكل اللى بيتناقشوا فيها النهاردة!

†9 فلما يجى حد النهاردة بيدرس لاهوت ويطلع بره ويأخد شهاده بيبقى المرجع بتاعه الناس دى، بعض الدارسين بيطلع وهو متأسس فى الفكر الارثوذكسى الأصيل فيعمل معارضة للحاجات دى ويقول أنه مش قابلها ويدافع عن الإيمان قدام أساتذته ويرجع انسان تقى وكويس ويخدم فى الكنيسة وبعضهم يتأثر ويجيله احساس أن احنا فى الكنيسة القبطية جهلة مش عارفين يونانى، مش بنقرأ، وأن احنا مشغولين بالعمل الرعوى أكتر من العمل اللاهوتى وأن كنيستنا فقيرة فى العلماء اللاهوتيين، وأن احنا مقدمناش أى انتاج لاهوتي للكنيسة العامة من أيام اثناسيوس وكيرلس، والدنيا بقت فقيرة مفيش حد تانى، وأن أحسن حاجة أننا نتعلم من الناس دى ويرجع بقى يقول للشباب أنتو مش عارفين حاجة تعالوا اسمعوا اللاهوت على أصوله ده البابا شنودة ضيع الكنيسة!

†10 لما نيجى احنا ونرد لا يا جماعة الكلام ده مش مظبوط يقولوا: ما أنتوا جهلة مش فاهمين حاجة!! طب أيه علاج الموقف ده؟!
أ- ان احنا نرجع لأثناسيوس وكيرلس دول الاساس.

ب- ونرجع للكتاب المقدس يعنى هنتوه ليه بعيد.

ج- ونرجع لليتورجيا الليتورجيا هى الصلوات اللى بنصلي بيها ولو احنا اتفقنا أن مرجعنا القديس اثناسيوس وكيرلس الكبير more than enough مفيش قضية لاهوتية ما اتكلموش فيها، وإذا رجعنا للكتاب المقدس ده الأساس اللى هما كان بيشرحوه محدش قال حاجه من عندياته.

†11 أى فكره فيها كلام نرجع ونسأل هل أثناسيوس قالها؟ أو كيرلس الكبير قالها؟ ما بين أثناسيوس وكيرلس 100 سنة، وفى الـ 100 سنة حدثت مشاكل لاهوتية كبيرة اتحسمت بردو مع البابا كيرلس فأصبح كل الإيمان المسيحى من القرن الخامس مش محتاجين نخترع حاجة جديدة الشطارة أن اعرف هما قالوا أيه وأثبت فى هذا الإيمان أى قضية بتتسأل أسأل الكتاب المقدس قال أيه؟ جت فى الليتورجية ازاى؟ آباءنا أثناسيوس وكيرلس قالوا أيه؟! ويبقى الموضوع اتحسم ونريح نفسنا!

†12 عايز أقولكوا أيه القاعدة الفكرية اللي أتبنى عليها النيو باترستك:-
هما كانوا لسه خارجين من أزمة الإلحاد بتاعة روسيا جم لأوروبا لقوها كلها ملحدة بس إلحاد روسيا كان عنيف فيه اضطهاد، وأنتهى الإلحاد سنة 1987م فى روسيا، وكانت الثورة البلشفية 1917 من العمال والفقراء ضد الاقطاع والأغنياء وركب الثورة الشيوعيين ومسكوا الحكم 70 سنة دمروا فيها البلد، وفى سنه 1987 وصل للحكم “جورباتشوف”وطلع مسيحى لكن متخفى فلما مسك الحكم أصدر قانون زى التسامح الدينى يعني كل واحد حر فى الدين بتاعة، وابتدت الكنايس تسترد أراضيها وممتلكاتها والناس تعلن مسيحيتها والدنيا مشيت لكن مازال فيه إلحاد فى كل حتة.

†13 النهاردة الإلحاد له أسئلة محتاجة إجابة، زى أزاى تقولوا أن الله صالح وهو عامل جهنم؟! فيه دولة فى الدنيا تعمل قانون أنه اللي يتعاقب تحطه فى نار فين حقوق الإنسان احنا عندنا أشر إنسان يتقبض عليه بكرامة يتحط فى سجن يتعاقب أه بس مش نار، ومش أبدية، وفيه دول كتير ألغت حكم الاعدام أيه الإله اللي يخلق جهنم ؟!، والابن الوحيد لازم يدبح عشان أبوه ينبسط؟!

†14 طيب احنا لما نيجى نرد هنرد بإجابات كتابية وآبائية وليتورجية، ونقنع الناس أن الحكاية دي مفيهاش أى نوع من عدم الصلاح ونجاوب، لكن هما أخترعوا اجابات جديدة وأدعوا أن الآباء قالوها زى أية الاجابات الجديدة ؟ زى أن مفيش جهنم!، ربنا مخلقش جهنم، أمال أيه لما المسيح قال نار أبدية دى؟! لا اللي يتحد بالله يشعر بالسعادة واللى ينفصل عن الله يشعر بالجحيم فطلعت الجحيم حالة نفسية! طب لما الكتاب بيقول نزل للجحيم هل راح للحالة النفسية؟!

†15 ويقولوا الله مش بيعاقب، دى الخطية بينتج عنها الموت، فدى نتيجة مش عقوبة! طب ما احنا فى القداس بنقول: أنت يا سيدى حولت لي العقوبة خلاص، وأقوال كتير للآباء عن العقوبة، والكتاب المقدس فيه عقوبة تقوله طب والطوفان؟! يقولك ده ميثولوجيا عرفتوا متربطه أزاى؟! الطوفان ميثولوجيا يعنى قصة ما حصلتش من خلالها عايز يوصل معنى، وقالوا اول 11 إصحاح من سفر التكوين كلهم ميثولوجيا! طب وهل الآباء قالوا كده؟ يقولك اه قالوا! لا ما قالوش لما تيجى تدرس آباء تلاقيهم قالوا العكس! وهما يقولولك أنت مش عارف تفهم الآباء في الأول أدرس الترمونولوجى فنقرأ الآباء يقولك لا ما كانش يقصد كده! لأن هو بيرجع للنيو باتريستك مش للآباء فعلا، هو فيه خلفية فكرية أستعمرت مخه فلما يجى يقرا كتاب مقدس وآباء يفسرهم على دماغه مش الكتاب هو اللى بيظبط دماغه.

†16 يقولك إلهنا صالح عشان كده الصليب مفيهوش عقوبة مفيش حاجة اسمها ايفاء العدل الإلهي مفيش حاجة اسمها مات عنا ده مات لأجلنا يعنى مات حب! ومع الأسف شباب كتير يقرأ ويتأثر ويفرح ويقتنع ويقول هو ده الكلام الصح! وأحدهم حاطط البابا شنودة والأنبا بيشوي والانبا موسى اللى قادوا الكنيسة بعيدًا! والنهاردة يصبوا جامهم على الأنبا روفائيل اللى قاعدلهم!

†17 لا طبعا مش عشان أجمل صورة الله أقول كده! ربنا ما طلبش أننا نجمل صورته هو الإله اللي ما بيعاقبش الاشرار يبقا صالح؟! أمال المسيح قال ليه للأشرار أذهبوا عني يا ملاعين إلى النار الأبدية المعده لإبليس وجنوده؟! هو أعدها لإبليس مش لينا لكن اللى بيمشى مع ابليس بيحط نفسه معاه! صلاح الله أنه لما شافنا أتظلمنا فى خطية آدم جه يجبر هذا الظلم يخلصنا ما سابناش أنا لو قلت أن الإنسان أتظلم انه ورث خطية آدم وبعدين ربنا سابنا كده مظلومين يبقى إله وحش لكن كونه لم تتركنا عنك الى الانقضاء بل تعهدتنا دائما بآنبيائك القديسين وفى آخر الأيام جيت خلصتنا من خطايانا يبان صلاح الله فى أننا لما أصبنا بخطأ آدم ما سابناش ولو ما كانش الخطأ أصابنا كان جه ليه؟!

†18 كان جه فى القرن الرابع واحد طلع اسمه “بيلاجيوس” فى شمال أفريقيا وقال بدعة اللي هى نفس الكلام اللى بيتقال النهاردة أن احنا مالناش دعوة بخطية آدم وحواء وكل واحد هيتحمل وزر نفسة فقط، فعملوله مجمع فى قرطاجنة، وكان حاضر فيه القديس أغسطينوس وقاله ان كلامه مش مظبوط لأن لو احنا مالناش صلة بخطية أدم لماذا جاء المسيح؟! فكنا لا نحتاج ذبيحة ولا صليب ولا فداء ولا معمودية ولا تناول ولا أى حاجه ليه ده كله حصل؟! لأن احنا طالتنا حاجة من أدم.فربنا أشفق علينا بدون ذنب مننا وأصابنا بخطية أدم وموته فجاء عشان يردنا الى رتبتنا الاولى مره أخرى ودى موجوده فى روميه اصحاح 5 بمنتهى الوضوح مش محتاجة تأويل قال:
بخطية واحد دخل الموت إلى العالم
عشان كده ربنا جه ببر واحد،ببرالمسيح وطاعته للآب
[اذن أخدنا الخطية من أدم بدون ذنب واخدنا بر المسيح بدون فضل مننا]
[أخدنا موت المسيح بدون ذنب وأخدنا حياة المسيح بدون فضل]
[تعبنا من أدم استرحنا فى المسيح]
[الميلاد الاول انى وارث حاجه وحشة الميلاد التانى يورثنى حاجة حلوة]
[الميلاد الأول طال كل البشر الميلاد التانى هيطول اللى هيقبل المسيح]

†19 الموضوع مش محتاح تعقيد والنيو باترستيك والفلاسفة اليونانيين بيقولوا حاجات مالهاش معنى عشان كده احنا مصرين أن احنا ورثنا خطية أدم
القديس كيرلس قالها ازاى؟! قال كنا فى أدم أخطأنا فى أدم دوسنا الوصية فى أدم بس احنا ما أشتركناش معاه فى الأكل فكل الطبيعة البشرية كانت فى أدم عشان كده بنقول فى القداس: “جبلنا وخلقنا ووضعنا فى فردوس النعيم عندما خالفنا وصيتكسقطنا من الحياة الابدية ونفينا من فردوس النعيم”
“سقطنا “.فين الفاعل؟ نا . احنا
“نفينا”.فين الفاعل؟ مبنى للمجهول
احنا سقطنا دى نتيجة، ونفينا دى العقوبة
النتيجة والعقوبة الاتنين موجودين.

†20 والآباء ياما قالوا طردنا من وجه الله. وجاء المسيح عشان يردنا تانى ونبقى فوق ويتحمل العقوبه بدلا عنا .يقولك مفيش حاجة اسمها بدلية عقابية .يقولك مفيش حد من الآباء الشرقيين قالها وأول واحد قالها هو أغسطينوس وطالع اغسطينوس وحش فى نظر الناس بتوع النيو باتريستك واللى مين حلو أوى وبيمجدوه أوريجانوس وبيحقروا فى أغسطينوس وايه الموازين االى بتتقلب فى اخر الزمن؟ فى القرن ال 21 هنحكم على ناس فى القرون الاولى محدش حكم عليهم اما يجوا يحكوا عن أغسطينوس يقولوا المطوب ولا يقولوا القديس اغسطينوس قال كذا ويقولك ده أبو اللاهوت الغربى!

†21 غربى ايه؟! وأيام اغسطينوس كان كيرلس الكبير عايش ولو غلط كان كيرلس الكبير يسكتله واغسطينوس حضر مجمع قرطاجنة اللى حكموا فيه ان اللى يقول أننا ما ورثناش الخطية الاصلية يبقا محروم وقرارات مجمع قرطاجنه عرضت على مجمع أفسس اللى كان حاضره البابا كيرلس الكبير ووافقوا عليه
نقعد دلوقت نفحص فى قضايا حسمت فى مجامع!!

†22 من وفرة الوقت عندنا هنقعد نبحث فى قضية اتحسمت فى مجمع قبل كده النهاردة نقول اوريجانوس زى الفل واغسطينوس غلطان وابو اللاهوت الغربى !! لاهوت غربى ايه!! ده كان الشرق والغرب فى وحدة وشركة لغاية القرن الـ 11 واغسطينوس كان فى القرن الرابع والخامس. يعنى ايه أبو اللاهوت الغربى!
اوعوا حد يمشى فى السكة دى لما حد يجى حد يقولك أغسطينوس ده بتاع لاهوت غربى من امتى كان بتاع لاهوت غربى؟! ما الكنيسة كانت وحدة جامعة ده الشرق والغرب بتاعة النهارده فى الزمن ده الوحش لكن أياميها ما كانش كده كانت كنيسة واحدة أى واحد بيروح اى كنيسة بيتناول مفيش طوايف أول انقسام كان فى خلقدونية 451 كان أغسطينوس مات من زمان، وظل بعد الانقسام وبعد ما طردونا احنا الكنيسة القبطية من المجمع بنفى القديس ديسقوروس ظلوا هما فى شركة للقرن الـ 11 . دلوقت يقولولك اغسطينوس ابو اللاهوت الغربى طب كنتو ساكتين ليه؟! ومحدش ليه من زمان طلع وقال أن اللاهوت ده مش مظبوط!

†23 أرجو لما تقروا الحاجات دى تبقوا عارفين الخلفية دى احسن هما فى فلاسفة أوى فى طريقتهم ، وأول مره اكشف الخلفية التاريخية دى كانت مع كهنة مصر الجديدة من سنه فاتت وبدأت الحرب بقا طالع لنا فى المقدر يكشفلنا سر الpatristic، لدرجة واحد منهم قالى انت بتفهم غلط ال new patristic مش n.e.w لكن دى n.e.o، ومش معناها الاباء الجدد،new هنا مش معناها جديد، كلمة neo فعلا كلمه يونانى لما تيجى تترجمها على جوجل هتلاقيها بالانجليزى new بالعربى هتلاقيها جديد، اكتب new patristic هتلاقوها البطريرك الجديد لأن patristic معناها آباء بيضحكوا على الناس عشان عارفين أن الناس غلابة وما بيقروش يونانى وما بيعرفوش لغات ويقولوا أن الأساقفة دول ما بيعرفوش حاجة ومجمع الاساقفة بتاعنا ده كله جهله محدش بيقرأ!

†24 لما تقروا حاجات زى كده أو حد يناقشك أفهم أن فيه خلفية تاريخية أن احنا كنيستنا ماشيين على ايمان اثناسيوس وكيرلس البابا شنودة كان مثقف جدًا وقارىء للآباء وصدقونى أنا أحيانا كنت أعتبر التفسير ده رأى شخصي للبابا شنودة يجى مع الوقت اقرا ألاقى ان الكلام ده قاله زمان ذهبى الفم الكلام ده قاله زمان كيرلس الكبير! كان البابا شنوده يقرأ ويقضى الاسبوع فى الدير قاعد ييعمل ايه يعنى ؟! كان اسبوعيا فى الدير ولغاية ما تنيح كان يقرأ وعنده مكتبة ضخمة وذاكرة فوتوغرافية كان بيقول لما أقرأ حاجة احفظها ومش محتاج أقراها تانى هو كان عنده الذاكرة دى البابا شنودة حفظ الكنيسة ضد كل التيارات المسيح استخدمه استخدام رائع! أربعين سنة كانت تنوير.

†25 الأنبا غريغوريوس اللي يقولك دلوقت ده غلبان ما كانش يعرف لغات كان يعرف 7لغات، ما كانش ينام، الناس اللي عايشين فى أنبا رويس لأن قلايته كانت فى أنبا رويس يقولوا طول الليل النور منور وقاعد يقرأ الناس اللى علمونا وربونا وأتلمذنا عليهم كانوا ناس بيفهوا مش يطلعوهم على أخر الزمن بعد ما تنيحوا تقول دول ما كانوش يعرفوا أمال لما كانوا عايشين ماكنتوش عارفين تتكلموا ليه؟!

†26 أوعوا حد يمشى فى السكك دى، ماحدث فى أوروبا يسقطوه علينا!! إذا كانوا هما هناك تأثروا بالفكر الغربى، احنا ماسمعناش عنه غير من الناس اللى قالت كده يقولك “حبيب جرجس” لما جه يدافع عن الكنيسة والارثوذكسية فى مواجهة البروتستانت ترجم كتب الكاثوليك!! فأصبح اللاهوت اللى اتعلموه البابا شنودة وحبيب جرجس والناس دى مش مظبوط!! النهارده حبيب جرجس اللى احنا اعتبرناه قديس بيعتبروه نكسة فى تاريخ الكنيسة! يعنى حاجة بتقلب الموازين!

†27 أنا فى الحقيقة تعبان من الحكاية دى ومتأثر بيها لانها بتحصد أحسن أدمغة أحسن ناس فى الكنيسة اللى هما بيقروا وبيحبوا المعرفة وبيدرسوا، وبينبهروا بالحاجات دى وبينجذبوا ليها ويجدوا فيها حاجة تغذى فكرهم، ويبتدوا يحقدوا على الكنيسة ويزعلوا أن الكنيسة كانت ماشية غلط ويشككوا الناس فى اللى احنا أتعلمناه.

†28 أنا شخصيا أتربيت على يد آباء قديسين علمونا كل ما هو نقى ومعتدل، وكل ما أقرا انهارده حاجة اكتشف أن هى دى فعلا اللى اتعلمناها، والقداس نفسه بيقول اللى احنا اتعلمناه، والعكس تماما ما نسمعه جديدًا نلاقيه غريب عن ودانا وغريب عن الليتورجيا وغريب عن الكتاب المقدس وغريب عن الآباء! ده ذهبى الفم ده له مقالات وعظات عن الجحيم وعن جهنم أد كده محدش يطعن فى ذهبى الفم كمان فأزاي تقولوا أن مفيش جحيم! وهكذا فى كل القضايا.

†29 موضوع “التأله” أيه موضوع التأله ده؟!
أنا عايز ودانكم تقولى سمعتم قبل كده فى صلوات الكنيسة يارب ألهنا؟!
أو نشكرك يارب لأنك ألهتنا؟!
فى قداس، فى أجبية، فى تسبحة ، فى بصخة، فى تمجيد، فى أى حاجه سمعتم يا رب ألهنا أو نشكرك لأنك ألهتنا؟!! مش موجودة.
لفظ “التأله” موجود فى كتابات الآباء واحنا لا نستطيع أن نرفضها.
كلمة “التأله” جاءت فى كتابات اثناسيوس وكيرلس والآباء الأوليين كلمة قانونية
بس عارفين أيه يه المقابل بتاعها؟!
المقابل بتاعها فى الليتورجيا:- “نشكرك لانك قد وحدتنا بك”
الإتحاد بالمسيح هو التألهأيه قصته؟
يقولوا الآباء ساعة ما الإنسان خلق، خلق على صورة الله ومثاله هو ده التأله ان احنا صورته. واتقالت “ألم اقل انكم ألهه وبنو العلى تدعون لكنكم جميعكم تموتون” مش زي الله طبعا!
لما جه المسيح عشان يؤلهنا يؤلهنا ازاى؟ يعنى يوحدنا بيه يوحدنا دى يعني فى المعمودية والإفخارستيا ويصير لا أحيا فى المسيح بل المسيح يحيا فى فنصير شركاء الطبيعة الإلهية بقيت إله أخلق وبقية الناس تسجدلى؟! طبعا لأ.
فى الابدية: هيدينا مجد أجسادنا المقامه من الأموات زى المجد اللى اخده المسيح فى جسده المقام، ويجلسنا معه فى عرشه”من يغلب فسأجعله يجلس معى فى عرشى”.

†30 المعنى الجميل اللي قاله الآباء: أن المسيح نائب البشر فالمسيح دخل كسابق من أجلنا وقال أن ذاهب لأعد لكم مكان لما اعده هاجى أخدكم.فلما جلس المسيح فى السماويات صرنا جالسين فيه .اخدنا الشرف والكرامة ان واحد من طبيعتنا جلس فى السماء فأقامنا معه.طبيعتنا أقيمت وأجلسنا معه لكن احنا لسه قاعدين هناهيقومنا معاه لانه قومنا بالعربون.هيقومنا بالحقيقة فى اليوم الاخير وهيجلسنا معاه فى اليوم الاخير،مش انهارده، احنا لسه بنغلط
لكن ساعة ما يقمنا ويجلسنا هنبقى مش بنغلط هنبقى فى الابدية السعيدة.

†31 عشان كده القداس ده نعمة من عند ربنا كل حاجة متسجلة فيه بنقوله :”أصعدت باكورتى الى السماء” و ده اللى هنسميه تأله يبدأ الأن فى اتحادنا بالمسيح سرائرى فى المعمودية والافخارستيا ويتحقق لما يدينا مجد فى جسدنا يوم القيامة. وحتى هذا المجد اللى هنخده فى جسدنا مش ممكن يكون مجد الالوهه .الاباء قالوها بعباره صريحة احنا ما نستحملش مجد الالوهه وأشعياء قال كده :”انا هو الرب ومجدى لا أعطيه لاخر”.

†32 لكن المسيح فى انجيل يوحنا 17 قال:
“أنا أعطيتهم المجد الذى أعطيتنى”
طب هو الآب اعطى للابن مجد ؟! أه
طب هل الآب أعطى الابن مجد الألوهة؟!
لا لا يمكن لأن لو الابن خد مجد الألوهة من الآب يبقا أريوس مظبوط. أمال أيه المجد اللى أخده المسيح؟! خد مجد فى ناسوته لما قام يوم القيامة لما قام من الأموات ده اللى يديهولنا ده اللى نستحمله لانه اخده فى ناسوته، وناسوته لما اتحد باللاهوت ما كانش فيه تغيير ولا الناسوت بقا إله ولا اللاهوت اصبح انسان
بنقول بغير اختلاط ولا امتزاج ولا تغيير ولا استحاله يعنى اللاهوت تحول لناسوت ولا الناسوت تحول للاهوت لكن لما المسيح قام من الأموات أخد مجد فى ناسوته هو ده اللى اسمه تأليه جسد يسوع لما قام من الاموات طول ما هو عايش على الارض كان بيأكل وبيشرب ويتألم ويتهان لما قام من الاموات بقى جسد ممجد هو ده اللى هناخده فى الابدية.

†33 طب أيه الفرق بينا وبين الناس التانية اللى بتتكلم عن التأله؟! الله يسامحه غريغوريوس بالاماس فى القرن 14 حط مبادىء جديده للتأله قال أيه؟؟ قال الواحد فينا لما يصلى والصلاة بتاعته تبقى نقية نتيجة الصلاة دى بيدخل فى استنارة والاستنارة دى بتدخله فى دهش والدهش بيخليه يرى النور الغير مخلوق ويتأله وبعد كده يبقى الطبيعة الإلهية جواه لاحظوا أن احنا فى الفكر بتاع كيرلس واثناسيوس التأله نعمة جايلى من عند ربنا من الاتحاد بيه ببساطه فى المعمودية والافخارستيا .كلكم واخدينها.

†34 التأله فى فكر بلاماس هو ممارسه طالعه من تحت لفوق تشبه اليوجا!! صلاة يسوع فى جبل أثوس حتى الآن يدخل فى مكان مظلم ويقولك نزل ذهنك جوه قلبك ومع كل شهيق تقول يسوع ومع كل زفير تقول يسوع وتبقى ريلاكس مع الممارسة يحصلك الاستنارة كل الكلام ده جاى من جنوب شرق أسيا العبادات بتاعة اليوجا! بيقولك الرهبان اختبروا ده طب ما البوذيين اختبروا ده دى مش نعمة ده مجهود جبت بيه النعمه ونورت النعمة ان أقوله ان أنا ضعيف يارب ارحمنى انا الخاطىء ينور حياتى بطريقة غير مفتعله كده الروحانية القبطية فى منتهى الجمال والبساطة ،شهداء لبيبا بيشهدوا على ذلك بدون ما يعملوا اليوجا دى استحملوا الاستشهاد وما اتربوش فى كنيسة علمتهم اليوجا. علمتهم يحبوا المسيح ببساطة.

†35 ليه يخرجوا كنيستنا القبطية من جوها البسيط الجميل ويعقدولنا الدنيا بفلسفات يقولك البابا شنودة هو اللى ضيع!! ده أنتوا اللى عايزين تضيعوا الكنيسة التأله استخدمها أثناسيوس فعلا فى برهان ألوهية المسيح لما بيكلم الأريوسيين لو مكانش المسيح فى الجوهر فكيف يؤلهنا؟؟ لو كان الآب أعطى نعمة للابن ان يكون إله زيه زى ما قال الأريوسيين فاللي أخد نعمة أزاى يوزعها؟؟ لو مكانش هو صاحب النعمة مش هيعرف يألهنا هما أخدوا الحتة دى وقالوا لو انت رفضت انه يؤلهنا يبقا أنت ضد اثناسيوس اه طبعا بس مش بالمفهوم اللى انت بتقوله بالمفهوم اللى بيقوله أثناسيوس هى دى النقطه اللى لازم تكتشفوها هو ممكن يطلعلك كتاب تجسد الكلمة ويقولك أهو التأله يبقى البابا شنوده غلطان وأثناسيوس صح قوله لا البابا شنودة قال نفس كلام أثناسيوس وأنتو بتقولوا كلام غريغوريوس بالاماس ما تقوله كده هيسكت لأنه هيفهم أن أنت فاهم!

†36 تدريب صلاة يسوع ده كلكوا عارفينه لا ليها عدد ولا ليها وضع مخصوص ودى قالها الأنبا أنطونيوس وأبو مقار متى جلست فى قلايتك لا تخلى ذهنك وقلبك من تمجيد اسم يسوع اللهم ارحمنى انا الخاطىء هما أخدوها وكانوا بيصلوا بيها كده زينا فى القرون الأولى جه بقى بالاماس وكان فى رهبان اسمهم الهدوئيين وبدأت الفكره أن فيه ناس بتهاجم الرهبان الهدوئيين وفيه ناس قالوا أن الناس دى بتضيع وقتها المفروض يخرجوا للمجتمع وينتجوا ونستفيد بيهم فهو (بالاماس) كان بيدافع عن الهدوئيين وله كتاب فى الدفاع عن الهدوئيين دخل بقى من خلال الحته دى ويقولك ده احنا من خلال الهدوء نصل للاستناره زى
(النيرفانا) عند البوذيين فى شرق أسيا بيقولوا نفس الكلام الواحد لما يقعد ريلاكس ويغمض عينيه بيوصل للإستنارة كده حاجه نفسية مش روحية!

†37 ومن عدة سنوات الجماعة بتوع التنمية البشرية فى كنايسنا القبطية بدأوا يجيبوا الحاجات دى ويدرسوها دى حاجات يوجا مش بتاعتنا احنا فى وسط القاهرة جات لنا واحدة تعلم اليوجا وقفناها قولنلها لا الأخت دى قالتلى أنت لو قعدت ريلاكس لمدة عشر دقايق كأنك نمت ساعتين وليها تكنيك معين ترخى عضلاتك بدءا من صباع رجليك الكبير والكعب فبيدى راحه فده علاج نفسى مش روحى! يحول صلاة يسوع البسيطة بتاعتنا الى تدريب يوجا ومن خلاله بيشعر بمشاعر نفسيةبس ده مش آباء قالوها .من حقك تقول أى حاجه بس ما تقولش أثناسيوس قال كده.من حقك النهاردة تخرج تقول أى حاجه بس ما تقولش روفائيل قال كده يبقى الحاجه تتحط فى مكانها.

†38 يبقى لما تقول مفيش خطية أصلية وتقول أثناسيوس منع هاتلى كلمة يقول منع ، بالعكس ده احنا عندنا قانون يمنع ان احنا ما نقولهاش مفيش قانون يقول أن اللي يقول أن احنا ورثنا الخطية الأصلية يبقى محروم .فيه العكس يقولك الآباء ما جابوش سيرتها.كتير من الحاجات ما جابوش سيرتها لما تكون حاجات مستقرة والناس ما بتتكلمش فيها لأن مفيش خلاف، لكن موجودة فى القداس لما يقولك (أكلت بأرادتى وتركت عنى ناموسك برائىوتكاسلت عن وصاياك.أنا اختطفت لى قضية الموت) وموجودة فى رومية 5 (في الكتاب المقدس) وموجودة فى أقوال الآباء لما أثيرت هذه القضية واتحط لها قانون يقولك ده مجمع محلى مالناش دعوه بيه.من امتى بنقول المجمع ده ملناش دعوه بيه! عشان مش على مزاجك؟!!

†39 جورج فلوروفسكى كان في 1928 وقرب يكمل 100 سنة هل نتيجة اللى قاله الإلحاد أنتهى واستريحوا الناس؟!! يعنى أنا تنازلت عن إيمانى عشان أريح الملحدين! هل سابوا الإلحاد وقالوا خلاص المسيحية بقت حلوة! أوعوا تقتنعوا بحاجة مش صح عشان نريح الناس الناس مش هتستريح أحيانا عشان تتنازل عشان ترضى الناس ومفيش حاجه هترضيهم!

†40 ده عامل زى الكنايس اللى راحت مخفضة الصيامات عشان الناس تصوم ما صاموش!! نقلل القداس عشان الناس تحضرمحضروش! بقى اللى بيحب القداس ما بيجيش عشان القداس اتمسخ بقا ماسخ! واللى مابيجيش فضل مابيجيش ما الكنايس كلها عملت التجربه دى وعايزنا احنا نعملها! يا جماعه الناس تعبت من الصيامات،طب اللى بيصوم ما أشتكاش.اللى بيشتكى مش هو اللى بيصوم.طب نقلل الصيامات هو طبيعى مش بيصوم والناس اللى كانوا ملتزمين بيحسوا ان الكنيسة باظت فسابوها فدول سابوها ودول فباعوا الكنايس بره عايزنا احنا كمان نعمل كده ! وبيقنعوا الشباب المثقف الواعى عايزين نعمل زى الغرب الناس دى متنورة طب ما الكنايس بتتباع صعبان عليهم ان لسه فى كنايس فى مصرصعبان عليهم أن أنتو بتحبوا ربناوبتيجوا تحضروا اجتماعات!!

†41 أوعوا تنساقوا ورا اى حاجة بتشكك فى الكنيسة لولا أن الكنيسة بتاعتنا آمينه ما كانتش بقت Survival فى وسط الجو اللى عايشين فيه بعد الصراع اللي عاشه البابا شنودة 40 سنة ما هديش يوم ما حطوه على الكرسى وهو متنيح بصيت له وقولتله أخيرًا نمت! بعد اربعين سنة من الجهاد يطلع فى الآخر دمر الكنيسة؟!!
نيافة الحبر الجليل الأنبا رافائيل

——————-

إلى التكملة الضرورية من .. كارثة العصر الحديث

الانبا رفائيل:

أنتبهوا مما يسمى بالديانة العالمية الموحدة!!

↓↓ أضغط على الصورة ↓↓

كارثة الديانة العالمية الموحدة!!

اترك رد

%d مدونون معجبون بهذه:
التخطي إلى شريط الأدوات